१० आश्विन २०८३, शनिबार १२:१८
भरतपुर । नेपाली कांग्रेसको १५ औं महाधिवेशन अन्तर्गत महाधिवेशन प्रतिनिधिका लागि नेपाल महिला संघकी केन्द्रीय अध्यक्ष मीना कुमारी खरेलले चितवन क्षेत्र नं. २ बाट महिला खुल्ला तर्फ आफ्नो उम्मेदवारी प्रस्तुत गर्नुभएको छ ।
साढे तीन दशकभन्दा लामो समयदेखि हिंसामा परेका महिला, असहाय बालबालिकाको उद्धार, संरक्षण तथा पुनःस्थापनाका क्षेत्रमा निरन्तर समर्पित खरेलको छवि एक कुशल सामाजिक अभियन्ताका रूपमा स्थापित छ।
समाजशास्त्रमा स्नातकोत्तर गर्नुभएकी उहाँ बौद्धिक, तार्किक र कुशल सांगठनिक नेतृत्व क्षमताको कारण चितवनमा चर्चित हुनुहुन्छ । २०४६ सालको जनआन्दोलनदेखि नेपाल विद्यार्थी संघ हुँदै पार्टीको जिल्ला कार्यसमिति सदस्य, महासमिति सदस्य र हाल नेपाल महिला संघको केन्द्रीय अध्यक्षको जिम्मेवारीमा रहेर उहाँले आफ्नो संगठनात्मक दक्षतालाई प्रमाणित गरिसक्नु भएको छ।
चितवनकै स्थायी बासिन्दा, स्थानीय भूगोल, समुदाय र कार्यकर्ताको सुख-दुःखसँग प्रत्यक्ष जोडिनुभएकी खरेलले राष्ट्रियता, लोकतन्त्र र समाजवादको आदर्शलाई अङ्गीकार गर्दै पार्टीलाई थप सुदृढ, समावेशी र महिलाहरूको बलियो प्रतिनिधित्व गराउन आफ्नो दाबी प्रस्तुत गर्नुभएको हो।
यही निष्ठावान् राजनीतिक यात्रा, उच्च शैक्षिक योग्यता, सामाजिक योगदान र स्थानीयस्तरमा रहेको बलियो पकड नै उहाँलाई महाधिवेशन प्रतिनिधिमा अत्यधिक मतका साथ विजयी गराउने प्रमुख आधार बनेका छन् ।
उहाँले चितवन क्षेत्र नं. २ का सम्पूर्ण प्रतिनिधि, नेता तथा कार्यकर्ताहरूसँग सहयोग, सद्भाव र अमूल्य मतको अपेक्षा राख्नुभएको छ।
प्रतिकृया दिनुहोस्