चितवनका महिला पत्रकारको स्तन क्यान्सरको निःशुल्क प्रारम्भिक पहिचान परीक्षण सम्पन्न

---

चितवन, ८ मंसिर ।
नेपाल पत्रकार महासंघ चितवन शाखाको आयोजना एवम् चितवन मेडिकल कलेजको सहयोगमा जिल्लामा क्रियाशिल महिला पत्रकारहरुको स्तन क्यान्सरको प्रारम्भिक पहिचान परीक्षण सम्पन्न गरिएको हो ।

चितवन मेडिकल कलेजले महिला पत्रकारहरुको लागि निः शुल्क परीक्षण तथा परामर्शको व्यवस्था गरेको हो । स्तन क्यान्सरको लक्षण र स्क्रिनिङ विधिका बिषयमा परामर्श गरिनुका साथै प्रारम्भिक जानकारीले रोगलाई उपचारयोग्य चरणमा पत्ता लगाउन सकिने परामर्शका क्रममा क्यान्सर रोग विशेषज्ञ डा सुदिप थापाले जानकारी दिए । सामान्य संकेतहरूको जानकारी, स्तनको स्वपरीक्षण, क्लिनिकल परीक्षण तथा म्यामोग्रामको महत्त्वका बिषयमा जानकारी हुनु तथा व्यक्तिको दिनचर्यामा समावेश हुने केही स्वस्थ बानीहरूले क्यान्सरलाई उपचार योग्य चरणमा नै पहिचान तथा उपचार गर्न सकिने डा थापाले परामर्शका क्रममा जानकारी गराएका थिए ।

सो क्रममा चितवन जिल्लामा कार्यक्षेत्र बनाएर काम गरिरहेका ३६ जना महिला पत्रकारहरु लाभान्वित भएका छन् । चितवन मेडिकल कलेजले आवश्यकता अनुसार पत्रकार महिलाहरुको लागि भिडियो एक्सरे र मेमोग्रामका लागि समेत निः शुल्क व्यवस्था गरेको थियो । रोग पहिचान भई शल्यक्रिया गर्नुपर्ने अवस्था भएमा ५० प्रतिशत छुटको व्यवस्था समेत गरिएको अस्पतालका कार्यकारी प्रमुख प्रताप देवकोटाले जानकारी दिए ।

अक्टोबर महिनालाई स्तन क्यान्सर सचेतना फैलाउने महिनाका रुपमा मनाउने क्रममा चितवन मेडिकल कलेजले महिला पत्रकारहरुको निःशुल्क स्तन क्यान्सर परीक्षणको व्यवस्था गरेको देवकोटाले जानकारी दिए । समयमा नै पहिचान भएमा क्यान्सर रोगको निधान गर्न गरिने भन्दै चितवन मेडिकल कलेजले सचेतनाका लागि सुरु गरेको अभियानमा हातेमालो गर्दै प्रारम्भिक पहिचानका समयमा नै अस्पताल आउनका लागि संचारकर्मी मार्फत सबैलाई आग्रह गरे ।

नेपाल पत्रकार महासंघ चितवन शाखाका अध्यक्ष बसन्त पराजुलीको अध्यक्षतामा सम्पन्न भएको कार्यक्रममा क्यान्सर रोग विशेषज्ञ डा सुदिप थापाले पत्रकार महिलाहरुको स्वास्थ्य परिक्षण गर्नु भएको थियो ।