५ भाद्र २०८१, बुधबार १३:५६
चितवन, ४ भदौ ।
भरतपुर अस्पतालमा पाठेघरको अपरेसनका लागि आएकी एक महिलाको उपचारका क्रममा ज्यान गएको छ । पाठेघरमा पलाएको मासु निकाल्न अपरेसनका लागि भरतपुर अस्पताल आएकी गैँडाकोट ५ घर भएकी सम्झना काफ्लेको ज्यान गएको हो ।
भदौ ३ गते अस्पताल भर्ना भएकी ३९ वर्षकी काफ्लेको पाठेघरमा सानो मासु पलाएको र सामान्य शल्यक्रिया गरेर मासुको डल्लो निकाल्नुपर्ने उपचारमा संलग्न डाक्टरले बताएका थिए । डाक्टरले अपरेसन गरेर मासु निकाल्नुपर्ने सुझाव दिएपछि संझना सामान्य अवस्थामा अस्पताल पुगेको थिईन् । डाक्टरको सुझाव अनुसार हिजो मंगलबार उनी उपचारका लागि अस्पताल भर्ना भएकी हुन् ।
भरतपुर अस्पतालका स्त्री तथा प्रसूती चिकित्सा विभागका प्रमुख वरिष्ठ स्त्री तथा प्रसूती रोग विशेषज्ञ डाक्टर सुनिलमणी पोखरेलका अनुसार सामान्य अपरेसन गर्नुपर्ने भएपनि अपरेसन थाल्नुअघि नै काफ्लेलाई समस्या आएको थियो । ढाड भन्दा तल लठ्याउने औषधि लगाए लगत्तै काफ्लेको मुटुमा समस्या आएको उनले बताए । उपचार अघि सम्म बिरामी नर्मल अवस्थामा भएको भएपनि एनेस्थेसिया दिएलगत्तै एक्कासी बिरामीलाई हर्टअट्याक्ट जस्तो भएको पोखरेलले बताए । अपरेसन सुरु नगर्दै बिरामीलाई आइसियूमा सारिएको र केहि सुधार समेत भएकोमा राती मुटुले कामै गर्न नसकेपछि उनको मृत्यु भएको डा. पोखरेलले जानकारी दिनुभयो ।
डाक्टर पोखरेलका अनुसार यस्तो खालको एनेस्थेसिया रियाक्सन मुटु सामान्य रहेका व्यक्तिलाई हुनु दुर्लभ घटना हो । दैनिक ५,७ जनालाई एनेस्थेसिया लगाएर शल्यक्रिया गर्दा पनि मुटुमा एक्कासी समस्या हुने अवस्था आफूलाई थाहा नभएको उनले बताए । उनका अनुसार पाठेघरमा नचिरीकन दुरबीनको सहायताले पलाएको मासु निकाल्ने तयारी गरिएको थियो । अहिले सामान्य खालको पाठेघरबाट मासु निकाल्ने शल्यक्रिया यसैगरि गरिन्छ । तर, एनेस्थेसियाले रियाक्सन गरेर मुटुमा समस्या भएपछि उपचार प्रकृया सुरु गर्नै नपाएको उपचारमा संलग्न चिकित्सकहरुले बताएका छन् ।
यता, परिवारका सदस्यले भने नर्मल अवस्थामा उपचारको लागि आएको बिरामीलाई चिकित्सकको लापरबाहीले गर्दा ज्यान गएको आरोप लगाएका छन् ।
आफन्तले चिकित्सको लापरबाहीको आरोप लगाएपछि चितवनका प्रमुख जिल्ला अधिकारी इन्द्रदेव यादवको समन्वयमा अस्पतालका पदाधिकारी, आफन्त, चिकित्सक लगायतको टोलीको बैठक बसिरहेको छ ।
प्रतिकृया दिनुहोस्