नर्सीङ्ग अध्यापनको लागी आयोगले तोकेको मापदण्डको बिरोधमा कलेजहरुको आन्दोलन घोषणा

---

चितवन २५, साउन । सिन्धु ढकाल
चितवनमा पि सि एल नर्सीङ्ग अर्थात स्टाफ नर्स अध्यापन गराईरहेका निजी तथा सामुदायीक कलेजहरुले संयुक्त आन्दोलनको घोषणा गरेका छन् । १०० शैयाको अस्पताल भएका कलेजहरुले मात्र स्टार्फ नर्स पढाउन पाउने भन्ने चिकीत्सा शिक्षा आयोगको प्रावधानको बिरोधमा यसअघि बिभिन्न चरणमा बिरोध र असहमति जनाउदै आएका कलेज संचालकहरुले आफ्नो माग सुनुवाई नभएपछि सडक आन्दोलनको घोषणा गरेका हुन् ।

रोजगारमुलक प्राबिधिक शिक्षालाई वढावा दिनुपर्नेमा सरकारी तवरबाट सम्वन्धन लिएर प्राबिधिक शिक्षा दिदै आएका कलेजहरुलाई बिना विकल्प संचालन खारेज गरेको बिरोधमा कलेज संचालकहरुले संघर्ष समिति गठन गरेर आन्दोलनका कार्यक्रम घोषणा गरेको हो ।
चिकित्सा शिक्षा सरोकार संघर्ष समिति चितवनले बिहिवार भरतपुरमा पत्रकार सम्मेलनको आयोजना गरि संघर्षका कार्यक्रम सार्वजनिक गरेको हो । सडक संघर्षका कार्यक्रम अन्र्तगत केन्द्रीय संघर्ष समितिको अगुवाईमा साउन २७ गते माईतिघर मण्डलामा धर्ना कार्यक्रम गर्ने , साउन २८ गते देशभरका शिक्षण संस्थाहरु बन्द गर्ने लगायतका कार्यक्रमहरु घोषणा गरेको छ ।

निरकुंश र स्वेच्छाचारी चिकित्सा शिक्षा ऐन परिवमार्जन, सीटीइभीटिको पुर्नसंरचना, स्तरउन्नती गर्न वाँकी रहेका संस्थाहरुको तत्काल भर्ना प्रक्रिया संचालन, कलेज बन्द हुँदा रोजगार खोसिएका पेशाकर्मी तथा कर्मचारीहरुको रोजगारीको ग्यारेन्टी, छात्रबृतिमा बिभेद अन्त्य गरि समानताको आधारमा छात्रवृतिको अवसर, नर्सीङ्ग लगायत पारामेडिकल बिषयहरु चिकीत्सा शिक्षाबाट अलग गराउनुपर्ने माग संघर्ष समितिले गरेको छ । १४ बुदे माग पत्रमा देशमा शिक्षा तथा स्वास्थ्य क्षेत्रमा भएको लगानीको सुरक्षा ग्यारेन्टी, हरेक तहका लागी छुट्टा छुट्टै अस्पताल चाहिने अव्यवहारिक कार्यविधीको खारेजी लगायतका माग संघर्ष समितिले अगाडि सारेको छ ।

बिहिवार भरतपुरमा आयोजना गरिएको पत्रकार सम्मेलनमा संघर्ष समितिका संयोजक शम्भु प्रसाद सुवेदीले चिकीत्सा सेवा आयोगले शिक्षण संस्थाहरुलाई नियमन भन्दा पनि निषेध गर्न खोजेको भन्दै अव्यवहारीक प्रावधानहरु खारेजीको माग गर्नु भयो । थोरै समय र लगानीमा आफ्नै क्षेत्रमा अध्ययन गरिरहेका बिद्यार्थीहरुलाई शिक्षावाट बन्चीत गरि बिद्यार्थीहरुलाई भारत र पाकीस्तान लगायतका छिमेकि देशमा अध्ययन गर्न जान बाध्य बनाउने काम आयोगले गरेको कलेज संचालकहरुको दाबी छ । चितवनमा संचालनमा रहेका १ सरकारी र २ सामुदायीक सहित १० वटा नर्सीङ्ग कलेजहरु बन्द भएका छन् । भरतपुर सामुदायीक अस्पतालले संचालन गरेको एक मात्र कलेजमा अहिले स्टाफ नर्सको अध्ययन भैरहेको छ ।

सरकारी अस्पताल भरतपुर अस्पताल सहित, बालकुमारी कलेज नारायणगढ, मैयादेबि कलेज भरतपुर, चितवन एकेडेमि, नारायणी सामुदायीक अस्पताल, श्री मेडिकल कलेज, आशा अस्पताल, मौलाकालिका अस्पताल, बोस्टन एकेडेमि, ओयसिस मेडिकल कलेज, भरतपुर मेडिकल कलेज आयोगले तोकेको मापदण्ड पुरा गर्न नसकेकाले बन्द भएका छन् । स्टाफ नर्स अध्यापनका लागी कम्तीमा सय शैयाको अस्पताल आफ्नै हुनुपर्ने, स्टाफ नर्स कार्यक्रम अध्यापन गराउने शैक्षिक संस्थाले एउटै अस्पताललाई आधार मानेर व्याचलर नर्सीङ्ग पढाउन नपाउने लगायतका आयोगको मापदण्डका कारण ती शिक्षण संस्थाहरुमा स्टाफ नर्सको अध्यापन बन्द भएको हो ।